ఎవరునీవు..?

పగుళ్ళిచ్చిన అవనిని
ముద్దాడిన తొలకరి జల్లువో
శిశిరం మిగిల్చిన మోడును
చిగురింప జేయ వచ్చిన వసంతానివో
వడగాడ్పుల నిట్టూర్పులతో వేసారిన
మనస్సును చల్లబరిచేందుకొచ్చిన మలయమారుతానివో
చీకట్లు ముసిరిన జీవితంలో
వెన్నెల్లు కురిపించ వచ్చిన నిండుజాబిలివో
నీ స్పర్శతో సరికొత్త అనుభవాన్నిచ్చిన
నండూరి వారి ఎంకివా..
రవివర్మ చిత్రానివా
బాపూ బొమ్మవా
ఎవరు నీవు...
మోడువారిన జీవితంలో
కొత్తవెలుగులు నింపిన
నా హృదయాంగనవా...ఎవరునీవు..?

- రాజాబాబు కంచర్ల