ప్రేమికుడు

నన్నెందుకు అంతలా కదిలించావు

తాకితే పగిలిపోయే గాజు పాత్రలా మార్చావు
నిండుకున్న పాత్రను నీ ప్రేమామృతంతో నింపావు
నీ మధుర స్వరంతో కోయిల గీతాలాలపిస్తావు
ఈ చిన్ని గుండెలో ఆనందం నింపుతావు
ఎన్ని యుగాలైనా మధురంగా ఆలపిస్తూనే వుంటావు
సేవించేకొద్దీ ప్రేమామృతాన్ని నింపుతూనే వుంటావు
అనుభవించేకొద్దీ ఈ గుండె నిండా ఆనందాన్ని నింపుతావు
ఇంతటి ప్రేమాస్పదమైన నీకు.. నేనేమీయగలను
నీ గానానికి వేణువుగా
నీ గాయానికి ఔషధంగా
నీ గతానికి భవిష్యత్తుగా
నీ మౌనానికి ఓదార్పుగా
నీ భవిష్యత్తుకు వారధిగా
నీ ప్రేమకు దాసునిగా
నిత్యం నిన్నారాధించే ప్రేమికుడిగా తప్ప...

- రాజాబాబు కంచర్ల
04-07-2016